F
felidae_74
Guest
Ja, do em Forum, do tumla sich scho Gschdalda,
des sollt ma ned fer meglich halda.
Breisa, Pfelzer ond o Schwoba -
ja ond da Sachs hon´s o neigschoba.
Do wärd dann o feschde debadiert,
ibr faschd alls – ganz oscheniert.
Weil se o alle so guat verschdonn,
äba wia´d Bleamla en dr Sonn.
Do got´s om´d Tomada ond hoache Hegga,
ond „Wia solle mein Modwerfr verschregga?“
Om´d Fisch ond Fresch em Gardateich,
ond „Hilf, mei Orchidee sigd aus wia a Leich!“
Roasa schneida ond verdegga,
das mer em Wendr ned verregga.
Fr dia Plenzla von ganz waid wäg,
was solle nemma fer an Dräg?
Was muaß en da Gmiasgarda nei
damit´s drhoim gibt koi Gschrei?
Graud ond Gruga ond Salot
das äba o jeder ebbas hot.
Ma red abr o ibr ganz andre Sacha,
dann lass´d ma´s hald em „Smoltog“ gracha.
Vom Essa odr´s Gwichd verliera,
do braucht se koiner groaß schenira.
Ond wenn´s dann immer schlemmer wird,
dann hod ma se em „Schbaß“ verirrd.
Ganz bäas wird’s dann bei de Schbämmer
globat´s mer – es got ned schlemmer.
Ach isch scho schea wia´s do dren loffd,
denn wenn se oir an Rasamäher kofft,
däar ganz arg rombld odr schdodderd,
vielleichd isch´er o a weng verlodderd,
däar frogt hald was ma macha kennt,
das ´s Maschele widdr rennt.
Do drenn, do weard oim scho g´holfa
ma hod da Rasa ja ned zom Golfa,
äba weil ma ses so gmiadlich machd,
das ds Gardahäarzle immer lachd.
